📜 Le Régime de Santé par Guy Parat (vers 1459)
De la char de volaille.
Il reste a present[1] parler de la char de volaille qui est plus en usaige, comme de la char de coqs, de gelines, chappons,
f° 65v°
oysons, anettes sauvaiges et privees, perdrix, faisans, cailles, paons, grues, teurterelles, coulons, estourneaulx, merles, alouetes, moigneaulx et autres petiz oyseaulx qui se prennent aux retz. Et fault savoir que, entre les oyseaulx dessus nommes, il en y a aucuns qui donnent bon et louable nourrissement et autres sont, dont le nourrissement ne vault gueres. Aucuns aussy, sont de tres bonne digestion et aultre de tres dure et difficille. Item aucuns sont de attrempee complexion et autres ne le sont pas.
Ceulx qui baillent bon nourrissement sont come gelines, pouletz, chappons jeunes et vieulx et qu’ilz soient bien gras, perdraulx, alouettez, teurterelles et les oyseletz qui se prennent avec les retz. Les aultres ne sont pas louables et ne engendrent pas bon nourrissement et sont de tres dure digestion et complexion non attrempee, comme oysons, anettes, paons et generallement tous oyseaulx qui ont les colz et les becz longs, et sont de tres dure digestion. Et les humeurs qui s’en engendrent sont bien melencoliques. Semblablement, estourneaulx sont de difficile digestion. Aussy sont merles et grues. Item la char de monnes est tres chaulde et tres loingtaine d’actrempance et esmeut fort a oeuvre charnelle, et n’est pas convenable entierement a santé.
Item il est des chars qui sont plus prouchaines a complexion attrempees que les aultres. Et plus attrempees sont jeunes gelines, pouletz, chappons jeunes qui, toutesvoiez, declinent aucunement a challeur et moisteur. Sembleblement [sont] les perdriaux ou jeunes perdrix.
Et ung docteur de medecine, qui s’appelle Consiliateur, dit que, entre toutes volailles, char de caille est la pire qui soit. Et dient aucuns
f° 66
que user de cailles engendre une maladie appellee spasmus, qui est une contraction des nerfs qui se retraient devers le chief; engendre aussy une autre maladie qui se nome thetamus, qui est retraicte d’aucuns nerfz et alonguement d’aultres. Touteffois, Gallien, au Regime de santé, loue plus, comme il semble, les cailles que les chappons, mais Consiliateur ne l’en suit point en ce cas, ains le reprent et impugne. Ja soyt ce que aucuns dient que Consiliateur n’entent mie que Gallien, di-je bien, car Gallien ne veult point parller de cailles, qui sont petiz oyseaulx, mais prent pour perdriaux les cailles. Et en ce pas, il entent les cailles, qui sont du genre des perdrix, qui sont plus grans oyseaulx. Et [ce] appert par la declaration qui fait lui-mesmes de sesd. oyseaulx au pas prealegué.
Mais les aultre volletilles dont nous avons dessus parlé, sont plus eslongnees de attrempee complexion, comme jeunes coulons et jeunes teurterelles. Item l’en se doit garder de user de la char des voletilles qui sont vieilles et dessus declarees, pour ce qu’elles sont trop chauldes et trop seches. Aussy, elles sont de trop dure digestion. Touteffoiz, la char du vieil coulon a de grans et merveilleuses vertuz pour ceulx qui sont epilentiques et paralitiques. Et les teurterelles vallent pour aguiser l’engin. Et les jeunes sont assez convenables aux corps haitiez. Touteffoiz, elles declinent a chaleur et secheresse. Et pour tant, on n’en doit pas user es regions chauldes. Et semblablement, jeunes gens et ceulx qui sont de grant eage et de chaulde complexion, s’en doyvent garder.
Notes
[1] Le titre de la rubrique est à droite de ce morceau de phrase.