📜 Le Régime de Santé par Guy Parat (vers 1459)
Le XVIIIe chapitre traicte comment l’en se puet preserver de la maladie et passion des joinctures, que nous appellons gouttes.
Pour ce que aujourduy plusieurs, par desordonné regime, encourrent l’enfermeté des joinctures, que l’en appelle communement gouttes, je parleray et ne mettray point regime pour curer et garder ceste maladie, car ce surmonteroit les livres et mettes de notre intention. Mais je bailleray seulement regime et maniere pour s’en povoir preserver et garder.
Je dy donc que en cas, l’en se doit garder de toutes choses qui debilitent et affoyblissent les joinctures et multiplient et croissent la douleur et matere dont vient si grant douleur, et qui font descendre ceste matiere aux joings. Ainsy ceulx qui craignent encourré ceste passion, se doyvent garder de la fumee de
f° 29
tout ce dont les alkymistes ont accoustume de faire et user en leurs distillations. Car ce debilite et affoyblit les nerfs et les joinctures. Item ilz se doyvent garder de vin aigre et de toutes choses aigres, car de leur naturelle proprieté, elles blecent les nerfz. Item laitages nuysans es nerfz et jointures. Aussy font poissons fraiz, car ilz amolissent trop. Item user accoustumement de pommes engendre douleur de joinctures es nerfz. Aussy font les aultres fruitz fraiz fort evaporans et fumans. Item aulx et generallement toutes choses chauldes de leur nature, nuysent aux nerfz et joinctures. Et en ce cas, l’en se doyt garder souverainement se charger de viande, que l’en se sente tant saul qu’on ait appetit de vomir sans y povoir actuellement parvenir. Et cestui appetit vient de des--mesuree replection, par laquelle l’estomac se charge de mauvaises humeurs, et est ceste replection la mere et sourse non pas seullement de la maladie des gouttes et aussy plusieurs aultres inconveniens. Item l’en se doit garder de faire grant travail et labourieux excercice incontinent apres son repas. Et souverainement, l’en se doit garder de exceder en compaignee de femmes, car telles choses sont cause de mal digerer et font aller la matiere indigeree aux joinctures et nerfz. Item l’en se doit garder desmesurament boyre et mesmement de vin subtil, tant avant son repas comme apres. Et semblablement, on doit eschiver a boire eaue pure. Et generallement boire oultrageusement quelque brevaige que ce soit, fait mal digerer et est cause de plusieurs indigestions. Et dormir de jour et mesmement incontinent apres son repas, car cestuy dormir est cause de la ruine, et si multiplie la matere rumatique qui es es joinctures.
Ceulx qui craignent encor-
f° 29v°
-ré la maladie des joinctures, doyvent user de viandes qui sont aulcunement de grosse substance, affin que les humeurs de ce engendrees, ne soyent pas subtilles ne convenable a descendre es joinctures par leur subtilité. Touteffoys, ceste viande ne doyt estre tant grosse qu’on ne la puisse digerer, car, par ceste indigestion, les joinctures pourroient estre blecees. Pour ceste cause aussy, l’en ne doit user de viandes fort chauldes affin qu’elles ne ouvrent les voyes et conduys des membres, et que les humeurs qui se engendrent, ne soient trop legieres a c’estendre. L’en ne doyt pas aussy user de viandes trop froydes pour doubte qu’on ne les puisse digerer. On se doyt doncques garder de poissons sallez et, generallement, de toutes choses contraires et repugnantes a toute digestion, comme sont chars de boeufz durs et bien vieulx, et char de pourceaulx mesmement qui est vieulx, et mesmement de bestes sauvaiges vielles, et par especial, quant esses sont sallees. Item l’en se doit garder de user de pain sans levain et de toutes viandes faictes de paste mal levee, car ce est fort contraire a digestion. Et en user coustumierement fait mal a digerer. Et, si l’estomac d’aulcune personne est tant fort qu’il puisse parfaittement digerer char de boeuf, elle luy est tres bonne, car le sang qui s’en engendre, mais qu’elle soyt bien digeree, est bon et louable, et si est de grosse substance, ce que nous desirons icy.
Item il est bon en ce cas de user de char de veau d’un an, de conins et de jeunes livres. Et s’il advient que l’en vueille user de poyssons, je ne le loue pas. L’en doit prendre de petiz poyssons des meillours et plus louables. Et ne doit l’en user de gros poyssons sans escaille. Et si on
f° 30
en veult user, il les fault cuire en vin, et en les cuissant, soyt mis du cynamoine couppé par menues pieces. Item on ne loue pas en ce cas user de petiz oyseletz, car ilz sont trop subtilz. Ceulx qui se doubtent de goutte, doyvent laisser touz potagez que les phisiciens appellent leguinam, comme sont poys, febves, car ces grains sont de grosse substance et difficiles a digerer, et pour tant ilz becent les joinctures. L’en se doyt aussy garder de courroux et de tristesse et de mangier de divers mes et de trop charger de quelque viande que ce soyt. Et ne doyt l’en mangier fors quant on se sent avoir grant fain. Item ceulx qui doubtent ycelle maladie, se doyvent garder d’avoir grant froit es extremitez du corps, comme es piedz et es mains; doyvent prendre ung comun clistoyre pour amollir le ventre.
Et devons savoir que ceulx qui craignent encourrir en la maladie de goutte, doyvent user en temps de saignees et medecines laxatives, selon la diversité de leur complexion, car, s’ilz sont sanguins, ce que la douleur des gouttes leur adviengne coustumierement de habondance de sang ou d’aultres humeurs, il n’est point de doubte que la sanguine ne leur est convenable; et, se ilz ne sont point de complexion sanguine et autre humeur se nourrisse au corps, il est bon lors user de medecine laxative qui soyt propre a vuider ceste humeur. Et selon la sentence de Ypocras, les saignees purgees par medecines laxatives, ne se sont jamais si convenablement qu’en printemps. Item il est bon en ce cas avoir aucuneffoiz aucuns vomissemens, car ce preserve le corps des douleurs des jointures et mesmement les membres d’em bas, car ilz purgent la matiere qui y souloit descendre et la
f° 30v°
destourne. Il est bon aussy accoustumer laver a jeun ses piedz et ses mains en eaue sallee, qui est telle de nature ou que l’en ait mis du sel : ce conserve la santé des joinctures. Est bon aussy laver ses piedz et mains ou l’en ait bouilly de la camomille, du melilot des roses et d’une herbe nommee siccados, qui est semblable a alesne.