📜 Le Régime de Santé par Guy Parat (vers 1459)
Le quatriesme chapitre traicte comment une personne grasse se pourra amaigrir.
Comment excessive maigraisse puet empeschier la santé, aussy fait oultrageuse et desordonnee gresse. Si, nous fault adviser la maniere de y povoir remedier, et pour bailler regle generale de ce, nous devons savoir que, en ce present cas, l’en doit user de regime en tout contraire et opposite a celuy dont a esté devant parlé. L’en recommende doncques icy viandes qui gueres ne nourrissent, quoyqu’on les prinst a grant quantité, et qui de leur nature devallent legerement et descendent en l’estomac et aux entrailles. Est bon aussy de soy fort travaillier et impetueusement excercicer. Item est bon de soy souffrir, avoir fain le plus qu’on puet. Il est aussy tres convenable de user souvent de la petite triffere et d’une medecine appellee dyabata. Et aucuneffoiz, doit l’en user a jeun de triacle et metridal et attendre a mangier par l’espace de six heures apres ce qu’on prins ceste medecine. Item se fault de garder de toutes choses semblables.
Ceulx donc qui se desirent amaigrir, doyvent communement user de pourrees et de toutes choses sallees et aigres, sures et agues. Et doyvent aussy efforcer d’aller legierement et avoir tousjours le ventre mol. Et doyvent procurer a avoir souvent urine et grans
f° 10v°
sueurs. Et avant mangier, doyvent faire quelque grant et impetueux travail. Doyvent aussy tant que possible est, endurer la fain et labourer a dormir durant cette fin. Item l’en doyt beaucop veiller et soy disposer et accoustumer a mangier une seule foiz le jour. Et doyt-on boyre vin viel et subtil, car il nourrit beaucoup moins que le nouveau, comme apres sera declairé. Est bon aussy de user a jeun de electuaires qui s’appellent dyatimini et dyation, fait de poivre. Et en doit-on prendre le gros d’une chastaine. Et ne fault mangier apres jusques a ce que l’en sente son appetit au commencement estre estaint par ces electuaires.
S’ensuyt une medecine tres convenable pour amaygrir. Prenez une dragme de puldre de verapigra et une dragme de turbich esleu et preparé; item troys dragmes de la petite triffere. Et tout soyt ensemble meslé. Et chacun jour, prendre la moittié de toute ceste recepte, ou de troys jours en trois jours.
Item grans vuidemens par fort aller en chambre et grans vomissamens pevent aucuneffoys engresser. Et devons savoir que, generallement, toutes medecines laxatives, diutiques, c’est a dire apperitives et prevocans, qui fort sechent, extenuent et amaigrissent la personne. Et pour plus brief dire, toutes medecines empeschans la viande aller aux membres et que ne la seuffrent arrester en iceulx membres, amaigrissent la personne, et pour plus bref, extenuent le corps.
Il appert donques, par ce que dit est, comment ung membre particulier externe pourra reprendre gresse et substance, car il fault adviser que, par les choses susdittes, la viande puisse estre abstraicte a iceluy membre et qu’elle y soyt retenue; finablement qu’elle y puisse estre tournee et convertie en la nature dudit membre. Et ce, pourra faire
f° 11
chacun phisicien moiennement expert, s’il pense bien aux enseignemens dessus touchez, car premier, il devera faire froter iceluy membre; secondement, il fauldra baigner en eaue; tiercement, il mettra sur ledit membre quelque chose glutineuse, comme sont sansues et aultres choses semblables.
Au sourplus, nous devons en ceste maniere entendre qu’il y a grant difference entre une personne grasse et charnue : car grasse vient de froit et moitte et n’est pas argument ne signe que la vertu digestive ou conversive soit forte, et n’est pas chose a louer ne a desirer; mais charnosité, qui est habundance de bonne char, est signe de la challeur et moitteur du corps et signifie largesse de bon sang et baille tesmoignage de bonne vertu digestive et desmontre aussy la force de la vertu digestive et conversive, et que les vertuz se reparent et restaurent ayseement. Il appert doncques que la charnosité n’est pas a blasmer comme est gresse, si touteffoiz elle n’est trop habundante et excessive.