📜 Le Régime de Santé par Guy Parat (vers 1459)
Le quatosiesme chapitre traicte de la conservation et de la santé des rains.
Qant les rains de la personne sont foybles et ne pevent acomplir ne excercer leur propre operacion et oeuvre naturalle, il est bon mangier char de mouton avec espinars. Item user de raisin de Tarse ou de Karesine sans les grains, conforte les rains et les moudiffie et purge des superfluitez fetulentes demourees de luxure. Ad ce aussy, sert mangier a jeun de la semence de melons avec du succre. Item farine d’orge preparee et cuicte avec lart de chievre, engresse les rains et les maintient en santé. Est bon aussy mangier avec le succre, grains de pin et amandes. Item lait de brebiz et de cameaulx ont une singuliere proprieté de conforter les rains. Aucuns naveaulx y sont bons. Et vin fait de raysins longuement penduz et qui soient comme secz, et se appelle ledit vin des phisiciens vin passus.
Item les choses qui s’ensuyvent sont bonnes aux rains : allrebreugi, qui est une herbe portans rouges grains comme cerises; aumonium, qui est ung petit grain souef flairant et vient d’Orient; anis; eaue ferree et eaue ou l’en estaint du cuivre et du metal; assarum, qui sont petiz grains et est la semence d’une herbe nommee cyperi, qui est la racine d’une herbe et est comme capres; andes; grains de pin; laurier; mirtus, qui est ung petit arbre comme genevre; squinatum, que nous appellons poil de camel et est une espice venant de oultre mer; turdus, qui est aussy une semance venant de oultre mer; vin doulx cler; et oeufz.
S’ensuivent les confections servantes aux reins :
Orasathirion, qui est ung electuaire fait d’une herbe appellee satirion; le electuaire fait de cynamome; le electuaire fait de yerapigra, qui est une medecine laxative; et semblables confections et electu-
f° 26v°
-aires.
Les choses qui s’ensuyvent nuysent aux rains : touz fruitz fraiz; grosses chars comme de boeufz et de chievre; lait aigre; exceder en compaignee de femme; et desmesuré travail; l’en dit aussy que eaue trouble; aulx; et prassium, qui est une herbe semblable a herbe de chat; aussy vin nouveau trouble fait mal aux rains.