📜 Le Régime de Santé par Guy Parat (vers 1459)
Le second traicté parle de la conservation du chief et garde et de chacun membre a part.
Le premier chapitre traicte de la conservation de la teste.
Les anciens phisiciens partirent et diviserent le corps humain en quatre principales parties, qu’ils appellent regions. Et la premiere de ces parties se nomme la region des vertuz sensitives, et contient le cerveau et les aultres membres adjoings. La seconde
f° 11v°
s’appelle la region de vertu de vie, en laquelle est le cuer avec les membres qui lui sont adjoings, comme le poulmon, la poictrine et aultres semblables. La tierce est nommee la region de vertu naturelle et icy sont l’estomac, le foye et les entraillez, la rate et le fondement. La quarte est la region de la vertu genative, en laquelle sont les membres, c’est assavoir : la verge de l’omme et les genitoires; et es femmes est la matrix.
Et, pour ce que les membres nommes sont de diverses complexions et diversement composes, comme ilz soient ordonnez a diverses oevres, ilz ont besoing diverses regimes pour les garder et maintenir en santé. Nous commencerons doncques a parler du chief. Et traitterons premierement comment la peau et cuir de la teste se puent conserver en santé et aussy des cheveulx. Et apres, nous parlerons du cerveau et des membres de la region de vie et de la region de nature, et de celle generacion. Adjousterons aussy la maniere de conserver en santé les membres de dehors.
Pour garder doncques et conserver la peau du cuir de chief de cloux, taigne et semblables maladies et d’autres ordures, comme de lentes et pareilles vermines, il est bon de laver sa teste. Et un petit apres, doit estre [appliqué] savon moul et coulant et non pas dur. Item pour santé de la teste, il est tres bon de laver deux foiz le mois, ou en deux mois deux foiz, de lexif simple ou composé artificiellement, selon la diverse complexion du cerveau. L’en doyt aussy pigner son chief d’un piegne d’ivire, et ce, avant le mangier, car, par ainsy pigner les subtilz pertuys de la peau, qui s’appellent porrosites, se oeuvrent, et les vapeurs des fumees montent en hault et vuydent par iceulx pertuys. Et si on ne a
f° 12
gueres de cheveulx, ou si ilz sont molz et foibles, il est bon de laver le chief de lexive faicte d’eaue ou ait bouilly de l’erbe qui s’appelle capillis veneris, c’est a dire cheveulx de Venus et de l’erbe nommee lierre, tant de celle qui rampe et monte sur les arbres ou vieille muraille, comme de celle qui croit sur terre sans monter en hault. Et doit ceste lexive estre faicte de cendres de boys d’olivier. Item oindre la teste de huille de aucti et de mastic, acroist et conserve les cheveulx si si [sic] les retarde de devenir gris et chanuz. Item la piere de quoy ce fait l’azur, a grant vertu et merveilleuse proprieté a garder et conserver les cheveulx. Pour soy garder aussy de devenir gris et chanu, il est bon de souvent laver sa barbe d’eaue froide. Pour ce aussy, la barbe s’entretient et se garde de chanir. Au sourplus, les grains de mirabolans et trebules, quant ilz sont confiz, deffendent et gardent devenir chanu et alonguent jeunesse. Et tous les phisiciens afferment qu’ilz font les gens sembler jeunes.
Pour garder le cerveau en santé, il est bon de sentir en yver aucuneffoiz fumees d’espices aromatiques, comme sont les boys de aloes, ambre, et semblables epices. L’en doyt aussy sentir herbes de bonne oudeur ainsy comme rommarin, marjolaine, balsamon et autres herbes odorantes, car les choses dessus nommees confortent le cerveau et si, ampeschent la rume, qui est tres souvent cause de la maladie des yeulx. Et en temps d’esté, est bon de sentir choses froydes de bonne et soufve oudeur, comme sont roses, violettes, orenges, limons, citrons et semblables choses. Item, pour conforter le cerveau est bon de user des viandes qui s’ensuyvent : poucins, jeunes aigneaulx, cervelles de poucins, pigeons commençans a voller et tuterelles, qui avec ce que a merveille confortent le cerveau, aguissent aussy l’entende
f° 12v°
ment de la personne. Est bon aussy de soy faire au matin esternuer a jeun, car telz esternuemens purgent le cerveau de pluseurs superfluitez et si se resveillent et esvertuent les sens et esperiz de la personne. S’ensuyvent les choses qui sont bonnes au cerveau : spic achorus, ensens, sacades, marjolaine, rue, noix muscade, miscus, mirabolans, trebules, qui sont come prunes confitees et viennent de oultre mer. Et pluseurs aultres choses servantes au cerveau : aulx, saffren, febves, lait, noix et semblables choses. Et sur toutes choses, les indigestions de l’estomac nuysent au cerveau, et sont meres et sourses de toutes maladies.