📜 Le Régime de Santé par Guy Parat (vers 1459)
Le XIIIe chapitre traicte de la conservation des entrailles et intestines.
f° 25
Les entrailles et intestines ou bouyaulx, se conservent en santé par les umidiffier et purgier des superfluites et ordures de dedens et des humeurs visqueuses et grosses qui s’i multiplient par mauvais regime ou par leur propre debilité et foyblesse, car humeurs visqueuses sont aucuneffoiz cause que l’en ne puet aller en chambre et empeschent la naturelle yssue de la matiere fecal. Pour umidiffier doncques et purgier les intestines et boyaulx des dessus dictes superfluitez visqueuses et humeurs, il est bon boyre, a jeun, de l’eaue faicte de miel que nous appellons bochet. Est bon aussy de mangier figues seches et grasses ou boyre de l’eaue ou elles auront esté cuictes. Et ad ce, vault l’eaue grasse de poulaille ou d’un aigneau d’un an cuict avec les blectes. Est bonne aussy l’eaue d’un coq viel cuict avec anis et une herbe appellee pelipode, qui croist sur muraille et sur les racines de vieulx cerisiers couppez et abatuz. Pour conforter les intestines, item mangier aulx cuitz, adoulcit la douleur des boyaulx et dechasse et consumme les ventositez grosses estans es boyaulx et mesmemment quant la personne a bon et fort estomac pour digerer. Et pour tant, dit Gallien que aulx sont tiriacle des laboureurs.
Item les choses que s’ensuyvent confortent les intestines et boyaulx : ape; anis; belirici, que est une espece de mirabolans et viennent de oultre mer, et servent, comme dit Avicenne, a ung des cinq principaulx boyaulx qui s’appelle le droit boyau; et noix aussy, come dit Avicenne, vallent a ung autre boyau principal, que les phisicient nomment orbum intestinum; item noix muscades, comme dit Halliabas, vallent aux intestines et boyaulx;
f° 25v°
aussy font pourcelaine, rue et vin bien pur et cler; et Ysaac dit que mangier a jeun des chastaines est bon aux intestines.
S’ensuivent les choses nuysans aux intestines :
Et premierement, toute maniere de porree, fors persilz et ape; toutes manieres de lait et laitages; item caourdes; concombres; poyres; coings; amandes moutes, c’est a dire vertes; moures et pommes de Grenade sures et aigres; item toutes manieres de grains dont l’en fait potaige, comme pois ciches, lentilles et semblables, comme dit est dessus, qui s’appellent des phisiciens leguninam, nuysent a ceulx qui ont les boyaulx et entrailles foybles; item retenir les ventosites et non aller en chambre quant l’appetit vient, fait grant mal aux antrailles et a l’estomac, et ceste matiere fecal ainsy retenue et contrainte, monte aucuneffoys d’un boyau en l’autre et vient jusques a l’estomac et puet engendrer une maladie dicte passion yliace, qui se prent au boyau nommé yloes, et ceste maladie est une maniere et espece de passion collerique : de ce aussy pevent venir pluseurs autres dangereuses maladies; item faire travail et excercice incontinent apres mangier, nuyt fort aux entrailles; aussy fait boire eaue froyde et trop se charger de vin; item estre en compaignee de femme tost apres son repas, affoiblit moult les entrailles et intestines.