📜 Le Régime de Santé par Guy Parat (vers 1459)
Le huitiesme chapitre parle de la conservation du poulmon.
Pour garder en santé le poulmon, il est souverainement bon user de cices froissees et pellees, cuictes avec du lait de chievre ou avec du beurre fraiz, car ce nourrist et conforte le poulmon. Ad ce aussy, servent grains de pin, amandes pellees, lait de chiefvre et raisins de Tarse ou de Quaresine, apres que les grains seront ostez. Et doit l’en prendre ces choses a jeun.
Pour conforter le poulmon, il est bon de tenir de la mirre soubz sa langue et avaler ce qui ce font; et est bon aussy de avaller le just de choux bien cler et purifié et seroit tres bon qu’il fust adoulcy de jus de rigolice. Item vin doulx cuit et qui est purgié de sa grosse substance, prouffite sur toutes choses au poulmon et a ses buseaulx, mais, que ce soyt avant et apres mangier, il soyt avallé doulcement et petit a petit. Le poumon aussy d’un regnart bien preparé et sechié et mis en pouldre et est bon au poulmon de la personne. Ad ce aussy, vallent escreviches d’eaue courrant, raynes et petiz lymacz qui sont es Ytaliez et en Prouvence sur le fenouil et se manguent comme moulles frites. Item y servent aussy caourdes conficte es en succre; febves; poys gris, que les phisiciens appellent fascroly et nous les appellons breiges qui ont grains rons, come petiz poys venans d’oultre mer qui s’appellent juviges; si sont aussy figues seches; pommes
f° 18
de Grenade doulces; viollettes de Quaresine; ysoppe; glay aux fleurs; et racines blanches laxative venant de oultre mer, qui se nomme manna. Il est bon aussi en ce cas de user de confections qu’on appelle electuaire des roys et electuaire des prelatz, desquelz Mesué fait planiere declaration.
S’ensuyvent les choses nuysans au poulmon : aulx rous crus; eaue froide; chastaignes et mesmement les fueilles du chastainier; le just de chous; pourreaux cruz et les grains qui s’appellent lentilles, qui en tours les grains plus nuysent au poulmon comme dit Ysaac.