📜 Le Régime de Santé par Guy Parat (vers 1459)
Le cinquiesme chapitre parle de la conservation et garde de la bouche.
Pour maintenir la bouche en santé, il est bon de laver avant manger, et par apres d’eaue chaulde, car ce nettoye la bouche et purge les humeurs de gencives, qui descendent du chief. Pour soy preserver de mauvaise alaine, il est tres convenable chacun jour de froter ses dens au matin a jeun, d’une pouldre faicte de cloux de girofle, de noix muscade et d’une espice appellee spicarnadi, qui se mect en l’ypocras.
f° 15v°
S’ensuivent les choses rendans l’alaine bonne et doulce :
Anis; citrons; galange; le boys d’aloues; une espice nommee mastis; cynamoine; mirabolans; trebules confiz et noix muscade; item l’electuarre appellee citomton, qui est une confection faicte de pommes de coing; l’electuaire nomé aromatic rosat, qui se fait de roses souef sentans; l’electuaire appellé gariofilatum, qui est composé de cloulx de giroffle; l’electuaire appellé gallia muscata : est une confection faicte de musc; l’ectuaire nommé trifere sarrassenice; axtridac, qui est une confection opiate et semblable a confection.
S’ensuyvent les choses qui sont la bouche puente et on se doit garder fort :
Vif argent et souverainement la fummee dudit vif argent, corrumpt la bouche et la salive. Item ce qui demeure de la viande entre les dens, est mesmement quant c’est du lait de laitages et de toutes choses qui se corrumpent legierement, font mauvaise alayne. Item l’en doyt tres songneusement laver la bouche et nectoier ses dens, et les froter doulcement de quelque escorche de arbre ou pellure de fruitz, de laquelle soyt amere et stiptice, c’est a dire restraindant, en faisant ung petit crepyz et unir la char de la langue. Et se, doyt l’en garder souverainement de rompre aux dens choses fort dures et de mascher choses visqueuses, comme sont dactes, miel cuict, confection de miel et semblables besoignes. L’en se doyt ausy garder de grans vomissemens, car ilz corrumpent les dens. Item l’en
f° 16
se doit abstenir de mangier choses froides, comme sont fruitz et toutes choses froydes, car elles engellent et refroidissent les dens.
Les choses qui s’ensuyvent aussy [sont bonnes] aux dens : lait; pommes de grenade; porreaulx; et raffanus, que nous appellons radis; l’escorche de citrons; et les fueilles de sauge sont tres convenables a froter les dens. Aussy y [est] tres bonne la pouldre qui s’ensuyt : prenez une dragme de corne de cerf brullee; une dragme de la semence d’un arbre nommé chamaris; une dragme d’une racine appellee cyperi; une dragme de roses et une dragme d’une espice nommee spic; item la quatriesme partie d’une dragme d’une maniere de sel qu’on appelle sal gemme; tout soyt uni, destrampé ensemble et passé en une estamine, ou par ung cendal. Et avant que l’en frote ces dens de ceste pouldre, on les doyt bien nettoier et purger, qu’il n’y soyt rien demouré de viande et des lymosites et de l’ordure fort athachee aux dens, et qui est comme angellee. Item ceulx qui sont fors diligatifz, come les princes et grans seigneurs, pevent froter leurs dens d’une pouldre faicte de perles avec ung bien petit de fin de succre; et tout soyt meslé ensemble. Ceste pouldre y est tres bonne, mais elle est fort chere.