📜 Le Régime de Santé par Guy Parat (vers 1459)
Le second chapitre traicte de la conservation et garde de la santé des yeulx.
Pour conserver les yeulx en santé, il est bon de non soupper, au moins de soy garder de excessivement soupper. Et ne doyt l’en dormir tost apres son menger. Pour conforter et conserver la veue, il est bon de user de la pouldre qui s’ensuit : prenez deux dragmez de eufrase et demie once de fenouil; une demie dragme de marjolaine; et autant d’une herbe appellee sillern montain; de tout soit fait une pouldre, de laquelle on prengne le plus souvent que faire se puet. Il est bon de regarder choses de couleur vert, car le vert conforte moult la veue. Et se doyt-on garder d’avoir le regart des choses blanches ou noires, car la longue veue des choses blanches espart et desassemble les esperitz visibles et fait mal aux yeulx; et le gart des choses noieres fait trop venir les esperitz visibles et est cause qu’ilz se refondent et amoindris-
f° 13
-sent.
Pour nettoier et purger les yeulx de superfluitez visqueuses, est bon de les tenir aucuneffoiz sur la fumee de l’eaue ou ait boully du fenouil, de la marjolaine ou eufrase. Et ce, a esté tres souvent experimenté et exprouvé. Pour conforter aussy la veue, il est bon de regarder souvent eaue clere en ung vaisseau vert. Et est tres bon de plungier les yeulx en ceste eaue, car par ce, la challeur naturelle des yeulx sains et haitiez se fortifie. Item il est bon de user de petiz oyseaulx, mesmement de turterelles. Et tant que possible est, l’en doit user de fenouyl, car ce conforte a merveilles la veue. Item l’urine d’un enfant masle avec une gomme appellee sarcocolle esclarsit la veue. Aussi fait tuertre mouillié en lait. Et a ce pareillement, servent toutes manieres de fiel ou amer de bestes, tant privees, domestiques comme sauvaiges sont plus aguz et plus fortes et celles de bestes, puces et domestiques sont plus doulces. Au sourplus, l’amer d’une beste puet estre prins plus agu une foiz que l’autre, car, si on la prent lorsque ses bestes sont courroucees ou familleuses, il est fort aspre et agu, et s’il est prins quant les bestes sont fort joieuses et bien saulles, il est doulx.
Et devons savoir que les anciens phisiciens traittans de la santé des yeulx, recommendent a merveilles les fielz des serpens appellez viperes. Et entre les autres Avicenne, qui est des plus nouveaux, dit que le fiel des viperes est une tres bonne medecine pour les yeulx et bien approuvé. Touteffoiz, je ne l’oseroye conseiller et ne la vouldroye appliquer a conserver la santé de l’ueil, ne a le garir de maladiez, sinon en tres bien grant doubte, et en gardant les condicions qui s’ensuyvent : premierement, que la vipere dont on pren-
f° 13v°
-droit l’amer, fust de celles que l’en pourroit mangier, comme declare Avicenne ou chappitre ou il parle de la cure de mesellerie; secondement, que cest fiel fust meslé avec aucunes medecines, par lesquelles sa force trop ague fust bien purgee dedens de toutes mauvaises humeurs; quartement, que la personne, a qui on vouldroit baillier, eust meur et dur eage, et que les crottes de ses yeulx fussent dures et de bonne resistence; la cinquiesme condition est que ces dictes crotes ne soient blecees ne affoiblees par quelque accident; la sixiesme est que la personne ait la bouche plaine d’eaue lorsque on appliqueroit a son oeil cestuy fiel, affin, se d’avanture quelque pou en descendoit en la bouche par le conduit de l’oyeul ou ne l’avalast point, mais se jectast dehors avec l’eaue.
Item naveaulx, tant aguz comme rous, ont bien singuliere proprieté a conforter la veue. Ad ce aussi [sert] moult pigner sa teste au matin a jeun. Et sur toutes choses est bon en ce cas d’avoir tousjours le ventre mol et lasche, car ce deffent les humeurs et vapeurs de monter au chief, pour quoy la veue est souverainement entretenue et confortee. Item pour nettoier yeulx, chassieulx et les purger de toutes superfluitez visqueuses, il est bon de les laver au matin d’eaue de fenouil, en laquelle soit destrempee une gommee appellee licium, qui est le jus de l’erbe de chiebrouc.
S’ensuyvent les choses nuysans aux yeulx : premierement, dormir tost apres mangier lors que l’estomac est encores replect, fait grant mal a la veue; et par especial, le dormir de jour y nuyst bien fort; item exceder en compaignie de femme, affoiblit moult le cerveau et a merveillez debilite la veue, et ce appert par experience, car nous veons regulierement
f° 14
ceulx estre amoindriz et debilitez de la veue, qui commettent grant exces en ce cas; item toutes choses agues nuysent a la veue, comme aulx, oignons, pourreaulx et semblables herbes, choux aussy, lectues et febves obscurcissent la veue, sy on en use continuellement : ceulx doncques, qui se doubtent de l’amendrissement de leur veue, se doyvent garder de choses agues, sures et poignans; item de fumee de pouldre, de fort vent et de feu. Sy doyvent aussy [re]garder continuellement choses trop menues, et de user de grans vins et fumeux, et de trop vieiller, de lire menue lettre et de regarder choses trop menues. Et de ces choses, sont aucuns vers en latin qui se pevent ainsy dire en françoys :
« Aulx, vins, febves, fumee, feu, fort vent
Et l’asmoureux mestier, nuysent aux yeulx.
Mais plus grant detriment leur fait le tard veiller.
Plourer aussy nuyst a la veue.
Et pareillement grans vomissemens.
Mais petiz et legiers vomissemens y sont bons.
Item poyssons, sel, toutes saulces
Et pourcellaine, font mal a la veue ».