📜 Le Régime de Santé par Guy Parat (vers 1459)
Le troysieme chapitre traicte de la conservation et garde de l’ouye et aureilles.
Pour conforter l’ouye, il est bon de mettre es oreilles du vin aigre tiede, car il conforte et conserve l’organe et membre servant a l’oye, et deffent que les humeurs remuatiques ne descendent au cerveau, aux oreilles. Et vauldroit mieulx encores, si, en cestuy vin aigre, l’en avoit desmeslé
f° 14v°
ung petit du jus d’une herbe appellee menute, qui ressemble chenoulle, car le vin aigre en seroit plus vigoreux et de plus grant vertu. Et ceste medecine oeuvre les conduys de l’ouye, et oste les opilations qui y pevent estre resisté aussy aux humeurs venans du cerveau, et les deffend de descendre pour conforter l’ouye. Il est bon de couller es oreilles de l’uyle d’amandes ameres ou de noyaulx de peches, et fault qu’elle soyt tiede. Ad ce pareillement, vault le sain d’une annesse ou la gresse d’un poysson nommé tenelis, coullé es oreilles. Il est bon aussy de tenir ses oreilles sur la fumee de l’eaue ou l’en ait bouilly de la lesne du poullieul royal.
S’ensuyvent les chosses nuysans a l’ouye : bruyt de moulins ou de aues qui chaient de hault; fors tonnerres; a tout grans sons de cloches et de bombardes. Et pevent estre ces sons tant vehemens et estounans, qu’ilz corrumpent et de-/ -struysent l’ouye et assourdissent de tous poins la personne.