📜 Le Régime de Santé par Guy Parat (vers 1459)
Le sexiesme chapitre traicte de la conservation et garde du fondement.
Le fondement, comme dient les acteurs de medecine, est ung membre qui legierement se griefve et blece et encourt hastivement maladies. Et quant il est malade, il se garit a grant difficulté. Si, a [-t-il] besoing de bon regime pour estre maintenu en santé. L’en se doit doncques garder en ce cas de soy seoir longuement a terre ou sur pierre froide. Item l’e [sic] se doit abstenir de user de grosses chars de bestes sauvaiges et de toutes choses engendrans grant colle, car la colle, par ce qu’elle est ague, blece le fondement. Item celui qui a le fondemant foyble, se doit garder generallement de toutes choses agues et de viandes stiptiques, qui ont en soy une ranceur. Et ne doit l’en point user de fruitz froitz.
Les choses aussy qui s’ensuyvent sont bonnes au fondement : anis; plat; karos, qui sont petiz en maniere de petitz poys et viennent de oultre mer;
f° 27v°
mirabolans; kebules de Inde, qui sont comme prunes confites; emblig, qui est une aultre espece de mirabolans; mirtus, qui est ung petit arbre comme genievre et roses; il est bon aussy en ce cas seoir sur cuir de leon, de choreu ou de cerf et ont cesditz cuirs une singuliere proprieté de conforter le fondement; aloes; anagallus, qui est une herbe que nommons agalle; et coloquintida, qui est une medecine laxative en maniere d’une pomme et vient de oultre mer.
Et ceulx qui ont le fondement foyble se doyvent garder tant qu’ilz pevent de toutes choses faictes et composees de aloes, qui est une gomme laxative. Mais si l’aloes estoit bien preparé, il ne s’en fauldroit point garder.