📜 Eléments de compte de Viénot de Roche, receveur de Besançon (1381-1387)
f° 185 v° — IXXXIIII v°
C’est li merchié Jehan Pralat.
[1737] L’am mil CCC octante et cinq, le jour du vanredy[i] apres la feste de Eucaristie, fut fait merchié par messeigneurs les governeurs de la citey de Besancon d’une part, pour et en non de ladicte citey, a Jehan, dit Pralet, citiens de Besancon d’autre [part], de faire cinquante toises de murs en la partie dever Jusam-Mostier et apres les murs neuf fait dessoub la porte de Jusam-Mostier et en tandant ver le Doub et jusque a chaffault de bois estant seur la querre dessus le Doub, du haut, du gros et de la facon que sunt les murs dessus fait, par la meniere que s’ensuet.
C’est a savoir que lidis Jehan doibt et a promis en bone foy, sanz fraude, barez et mavaix engim, [faire] lesdictes cinquante toises de murs du ault, longe, gros et a la facon et meniere ou meilleur des mours jay fait dessus, c’est a savoir la toise pour le pris et some de sept flurins et demy, a rendre et pahier adit Jehan en facant ledit hovraige, liquelx Jehan doibt soignier pierre, traire, taillier, chaulx, aloinne, aigue et toutes autres chouses neccessaires a ladicte huevre — exceptey que l’on li doibt traire aloinne seur de l’aigue et pierre a forney de Jusam-Mostier pour faire la chault pour lesdiz murs.
Ce fut fait et accordey comme dessus par mesdis seigneurs les governeurs, en non que dessus, a Jehan Pralet.
Jehan Pralet.
[1738] L’am mil CCC octante et cinq, le jour du mercredy[ii] apres la feste saint Martin en yvert, messeigneurs les governeurs de la citey de Besancon hont conffessey en veritey que Jehan Pralet, citiens de Besancon, bien dehuement et lealment a renduz, esseviz lesdictes cinquantes toises de murs deans le terme deanz lequel illes doivant rendre esseviz, et, moynant ce, yl a confessez luy estre pahiez par entier et satiffait de la some que dehue li estoit pour ledit huevre, reservey a ly que messeigneurs les governeurs li doivant faire a acomplir le paiement des cedules que pour ce li sunt faites, c’est a savoir de celles desquelles il n’est encour pahiez.
Doney comme dessus.
[1739] Depuis et le juesdy avant la Chandelouse[iii], que fut l’am mil CCC octante et six, confessit lidis Jehan Pralat que il estoit pahiez entierement de toutes les cedules que li sunt faites pour ledit huevre.
Doney comme dessus.
Jehan Pralat.
[1740] L’am mil CCC octante et six, le jour du juesdy[iv] avant la Chandelouse, fut vehuz li huevre que a fait Jehan Pralat pour la Ville en la tour nove dessus le Doubz dever et desoubz Jusain-Mostier, par laquelle vision fut trovez que lidis Jehan avoit fait et esseviz XXVII toises de murs en ladicte tour, la toise de quelle vault sept [v] flurins et demy, qu’est en toutes somes: IICII flurins et demy, don a recehuz lidis Jehan Pralat de la Ville, par Vienat de Roiche, en toutes somes: huit vinz et dix flurins. Et, par ensy, li doit la Ville: XXXII flurins et demy, lesquelx l’on li doibt pahier devant ce que il entroit en l’essevissement de ladicte tour.
Escordez et fait par Jehan Nasey, Hug[ues] Du Change, Estienne de Villate, Jehan Pralot et Perrin de Vaulx, l’am et jour que dessus.
Et querelé et grehusé lidis Jeham enver la Ville ce que y a trait [vi] aloinne pour ledit huevre, seur quoy l’on ne li a riens contez. Et doibt esse[v]ir le demorant de la tour lidiz Jehan segon le bon avis de messeigneurs les governeurs, pour le pris et some que dessus.
Doney comme dessus.
Notes
[i] 1385, 2 juin.
[ii] 1385, 15 novembre.
[iii] 1387, 31 janvier.
[iv] 1387, 31 janvier.
[v] Rayé: semainnes.
[vi] Rayé: a la Ville.