📜 Eléments de compte de Viénot de Roche, receveur de Besançon (1381-1387)
f° 184 — IXXXIII
Merchiez Jehan de Montjustim.
[1695] L’am mil CCC octante et trois, le mercredy[i] devant le diemange que l’on chante en sainte ynglise Occuli mei, fut merchiez fait entre messeigneurs les governeurs de la citey de Besancon, pour et en non du Communz et des habitanz dudit lieuc, d’une part, et Jehan de Montjustim, maceon, demorant a Besancon, d’autre part, de traire et taillier par ledit Jehan vint milliers de durte es terralx des murs de Saint-Estienne.
Liquelx Jehan, pour et a profit de ladicte citey, a venduz et a promis detruire, a ses missions, penz et despens, es-diz terralx, vint millier de durte et ycelle bien, lealment et suffisamment taillier pour ovrer es murs de Saint-Estienne.
Et, pour sa painne et labour, il doit avoir, du millier comme dit est trait et tailliez, saze flurins (contez en la some XL blancs pour ung flurin), lesquelx la Ville li doit pahier segon ce que il randra d’ovraige.
Et lidis Jehan doit rendre lesdix vint millier trait et tailliez dois cy a la feste de la saint Michié prochainne venant. Et est a savoir que lidis Jehan ne doit [ii] taillier crates, archieres ne anglars.
Doney et accordeiz comme dessus.
f° 184 — IXXXIII
S’ensuegvent les paiement fait adit Jehan [de Montjustin] pour le merchiez dessus escrip.
[1696] Premierement, en rabatant de ce que dehuz sera adit Jehan de Montjustim, hont pahiez lesdiz messeigneurs les governeurs adit Jehan en pierre, que ja estoit traité et taillié es-diz terralx, es missions de la Ville: XVI flurins.
[1697] Item pahiez adit Jehan, pour la cause que dessus, le diemange[iii] de Letare, l’am mil CCC octante et trois: XXV flurins.
[1698] Item l’am que dessus, le jour du diemange[iv] de Judica me, pour la cause que dessus, pahiez adit Jehan: XV flurins.
[1699] Item l’am que dessus, le jour de Paisque fluriez[v], pour la cause que dessus, fut pahiez adit Jehan: XX flurins.
[1700] Item l’am mil CCC octante et quatre, le juesdy[vi] devant saint George, pour la cause que dessus, fut pahiez adit Jehan: XXIIII flurins et demy.
[1701] Item l’am que dessus, le mercredy[vii] apres la saint George, fut pahiez adit Jehan, pour la cause que dessus: X flurins.
[1702] Item l’am que dessus, le sambady[viii] devant saint Philipe et Jaique, fut pahiez adit Jehan, pour la cause que dessus: XIII flurins.
[1703] Item l’am que dessus, le diemange[ix] apres saint Philipe et Jaique, pahiez adit Jehan, pour la cause que dessus: X flurins.
[1704] Item l’am que dessus, le diemange[x] apres l’Ascencion Notre Seigneur, pahiez adit Jehan, pour la cause dessus: XX flurins.
[1705] Item l’am que dessus, la voille de la Trinitey[xi], pahiez adit Jehan, pour la cause que dessus: XVI flurins.
[1706] Item l’am que dessus, le jour de la Penthecoste[xii], pahiez adit Jehan, pour la cause que dessus: VI flurins.
[1707] Item l’am que dessus, le mercredy[xiii] devant la Nativitey saint Jehan, pahiez adit Jehan: VI flurins.
[1708] Item l’am que dessus, le mercredy[xiv] apres saint Pierre et saint Poul, pahiez adit Jehan: IIII flurins.
[1709] Item l’am que dessus, le lundy[xv] apres les huitanes saint Pierre et saint Poul, pahiez adit Jehan: VII flurins.
[1710] Item l’am que dessus, le vanredy[xvi] devant la saint Lorent, pahiez adit Jehan par ledit Vienat, pour la cause que dessus: IX flurins.
[1711] Item l’am que dessus, le lundy[xvii] devant la saint Lorent, pahiez adit Jehan, pour la cause que dessus, par ledit Vienat: IIII flurins.
[1712] Item l’am que dessus, le vanredy[xviii] apres la saint Loret, pahiez adit Jehan, pour la cause que dessus, par ledit Vienat: VII flurins.
f° 184 v°
[1713] Item pahiez adit Jehan par ledit Vienat, le jour de saint Bartholomey[xix], l’am que dessus: X flurins.
[1714] Item pahiez adit Jehan par ledit Vienat, pour la cause que dessus, le jour que dessus[xx]: IIII flurins.
[1715] Item pahiez adit Jehan, pour la cause que dessus, le vanredy[xxi] apres la Decollacion saint Jehan: VI flurins.
[1716] Item pahiez adit Jehan par ledic Vienat, pour la cause que dessus: IIII flurins.
[1717] Item pahiez adit Jehan par ledit Vienat, le lundy[xxii] devant la sainte Croix, pour la cause que dessus: X flurins.
[1718] Item pahiez adit Jehan par ledit Vienat, pour la cause que dessus, le lundy[xxiii] apres la saint Michel: X flurins.
[1719] Item pahiez adit Jehan par ledit Vienat, pour la cause que dessus, le lundy[xxiv] apres la saint Denis, l’a [sic] que dessus: VI flurins.
f° 183 — IXXXII
Merchiez Thomais Du Change.
[1720] Nous les recteurs et governeurs de l’Universitey de la citey de Besancon, [xxv] pour et en nom du Communz et des habitans de Besancon d’une part, et ics[?] Thomaix Du Change, citiens de Besancon, d’autre part, facons savoir a touz presenz et a venir que nous, lesdiz recteurs et governeurs, reguerdant et considerant le grant et evidant profit de ladicte citey, vuillant auxi pour notre pouhoir reediffier, reediffier [sic], [xxvi] moillourer et enfourcier la forteresce et les murs de ladicte citey, et singulerement et escpec[ialement] les murs, terralx et tours de Saint-Estienne, que a present en hont tres grant neccessitey, voihant auxi et saichant par pure et bone informacion seur ce faite la bone amour, la grant diligeance et favour que tout temps a ehuz a nous et a ladicte citey lidis Thomaix, et que encour de present y a, et de jour en jour en celle persevere et multiplie seur la reffection desdiz murs, tours et terralx de Saint-Estienne, aveuc ledit Thomaix et lidis Thomaix aveuc nous, avons traitiez et merchandez ensamble et de ung communz accort, par la meniere que s’ensuit, c’est a savoir que adit Thomaix nous avons lessiez a faire en taiche trantes toises de murs par terre a faire et a ovrer en la meniere que s’ensuit.
Et est telle que lidis Thomaix fera et acera le gros des murs de Saint-Estienne de sept piez messis. Et en comancera a ovrer dever la partie de Mal-Pais dever laquelle partie, c’est a savoir dois la Tour-a-Deable jusque a fin bon desdiz murs, de tant de ault com les murs seront, il devra tout acier messis et a crate, et les autres murs devra soulement le gros d’yceux acier, comme dit est de sept piez. Et, par dessus ce gros, a long devra faire menuz murs d’une toise de ault a crate et a archieres. Et si plait a nous, governeurs, lidiz Thomaix devra faire piles pour chaffault, et, se il ne nous plait, il lesseray plesce es-diz murs, c’est a savoir la ou nous li ordenerons pour faire eschiffes de pierres, lesquelles nous devrons faire es missions de la Ville, se de novel nous ne merchandons d’ycelles a ly. Et les tours devra lever du gros que elles scont par dessoubz des crannealx une toise par dessus touz autres murs, et, par dessus les craneler et lealment hovrer a crate.
Et toutes chouses neccessaires, qu’elles que elle soint et comment que elles puissant estre dictes ou appellees neccessaires a faire l’ovraige dessus-deviseiz, devra et doit soignier lidis Thomaix, a ses missions et despens — exceptey traire et taillier duite, archiere et taillier crates, lesquelles nous li devons soignier es terralx dessus-diz traité — et toutes angleires — excepteiz des achiffes — doit taillier et esseoir et en s’en quetant bien et lealment.
Doit essevir ledit hovraige dois cy a la feste saint Martim d’ivert premiere et prochainne venant. Et, ces ovraige esseviz et aviez com dessus, nous doibt rendre esseviz lidis Thomaix, c’est a savoir la toise pour le pris et some de huit flurins, ou menoie a la valour (contez XL blancs pour ung flurin), se les blanz ne decheoint en moindre valour.
Et est a savoir que de ovale nous devons guerder ledit Thomaix, c’est a savoir se acunlx fondement ou acorchement des murs viez failloit refaire, refonder ou renduré, que nous cela es missions de la Ville le devons faire, et auxi ce que il fera des murs, nous devrons enduré es missions de la Ville. Et ce que dehuz li sera pour ledit hovraige, nous promectons en bone foy de bien et lealment pahier a ly, c’est a savoir de toutes toises, toutes huit flurins. Et li en avons obligiez et obligions les biens de ladicte citey, et auxi li, a nous, a obligiez tout ses biens, etca.
Doney et fait le XIXe jour de mars[xxvii], l’am mil CCC octante et trois.
f° 183 v°
Ce sunt les paiement fait a Thomaix Du Change pour l’euvre que il fait es murs de Saint-Estienne.
[1721] Premierement, l’am mil CCC octante et [xxviii] quatre, le juesdy[xxix] devant la feste saint George, pahiez, pour ledit ovraige, adit Thomaix et par ledit Vienat: C flurins.
[1722] Item l’am que dessus, le mercredy[xxx] apres la saint George, pahiez adit Thomaix par ledit Vienat: LX flurins.
[1723] Item l’am que dessus, le mercredy[xxxi] apres saint Pihlipe et Jaique, pahiez adit Thomaix, pour la cause que dessus, par ledit Vienat: LX flurins.
[1724] Item l’am que dessus, le juesdy[xxxii] apres ladicte feste, pahiez adit Thomaix par ledit Viena, pour la cause que dessus: LXIIII flurins.
[1725] Item l’am et jour que dessus[xxxiii], pahies adit Thomaix par ledit Vienat, pour la cause que dessus: XX flurins.
[1726] Item l’am que dessus, le lundy[xxxiv] devant la saint Ferruef, pahiez adit Thomaix par ledit Vienat, pour la cause que dessus: XXX franc.
[1727] Item l’am et jour que dessus[xxxv], pahiez adit Thomaix par ledit Vienat, pour ladicte cause: XII flurins.
[1728] Item l’am que dessus, le lundy[xxxvi] apres huitanes sainct Pierre et saint Paul, pahiez adit Thomaix par ledit Vienat, pour la cause que dessus: XII flurins et demy.
[1729] Item l’am et jour que dessus[xxxvii], pahiez adit Thomaix par ledit Vienat, pour ladicte cause: XXX franc.
[1730] Item l’am que dessus, le vanredy[xxxviii] devant la saint Lorent, pahiez adit Thomaix, par ledit Vienat, pour la cause que dessus: XV franc.
[1731] Item l’am et jour que dessus[xxxix], pahiez adit Thomaix, pour la cause que dessus, par ledit Vienat: III flurins.
[1732] Item l’am que dessus, le lundy[xl] devant la saint Bartholomey, pahiez adit Thomaix, par ledit Vienat, pour la cause que dessus: LX franc.
[1733] Item l’am et jour que dessus[xli], pahiez adit Thomaix par ledit Vienat, pour la cause que dessus: XX flurins.
[1734] Item pahiez adit Thomaix par ledit Vienat, pour la cause que dessus, le vanredy[xlii] apres la Decollacion saint Jehan l’am que dessus: IIC flurins.
[1735] Item pahiez adit Thomaix seur l’abbey de Balevaul par Vienat de Roiche, le lundy[xliii] devant saint Nycholaux d’ivert l’am que dessus: XVIII flurins.
f° 185 — IXXXIIII
Merchiez fait a Thomaix Du Change de l’achiffe de Saint-Estienne.
[1736] L’am mil CCC octante et quatre, le jour du mercredy[xliv] apres les hutanes de la feste saint Pierre et saint Poul apostres, fut fait merchiez par messeigneurs les governeurs de la citey de Besancon, pour et en non du Communz d’icelle, d’une part, et Thomaix Du Change d’autre part, c’est a savoir que lidis Thomaix, pour le pris et some de quarante et cinq flurins, doibt et a promis de faire et essevir de tout point — exceptez de grapes de fer — l’achiffe nove de ceste la Tour-a-Diable, et soignier toutes tailles et toutes missions neccessaires a ladicte achiffe, sanz acune chouse excepter fenique lesdictes grapes.
Et la doibt essevir bien et lealment segon ce que ordenez li est par lesdiz messeigneurs les governeurs pour ledit pris.
Lequel pris li devront pahier lesdis governeurs bien et lealment. Et est a savoir que, non obstant lesdis quarante et cinq flurins, li governeurs devront pahier adit Thomaix, pour chescune toise de ladicte eschiffe, tant de gros murs com de menuz: huit florins.
Doney comme dessus.
Notes
[i] 1384, 9 mars.
[ii] Rayé: traire ne.
[iii] 1384, 20 mars.
[iv] 1384, 27 mars.
[v] 1384, 3 avril.
[vi] 1384, 21 avril.
[vii] 1384, 27 avril.
[viii] 1384, 30 avril.
[ix] 1384, 8 mai.
[x] 1384, 22 mai.
[xi] 1384, 4 juin.
[xii] 1384, 30 mai.
[xiii] 1384, 22 juin.
[xiv] 1384, 6 juillet.
[xv] 1384, 11 juillet.
[xvi] 1384, 5 août.
[xvii] 1384, 8 août.
[xviii] 1384, 12 août.
[xix] 1384, 24 août.
[xx] 1384, 24 août.
[xxi] 1384, 2 septembre.
[xxii] 1384, 12 septembre.
[xxiii] 1384, 3 octobre.
[xxiv] 1384, 10 octobre.
[xxv] Rayé: facon.
[xxvi] Rayé: et.
[xxvii] 1384, 19 mars.
[xxviii] Rayé: trois.
[xxix] 1384, 21 avril.
[xxx] 1384, 27 avril.
[xxxi] 1384, 4 mai.
[xxxii] 1384, 5 mai.
[xxxiii] 1384, 5 mai.
[xxxiv] 1384, 13 juin.
[xxxv] 1384, 13 juin.
[xxxvi] 1384, 11 juillet.
[xxxvii] 1384, 11 juillet.
[xxxviii] 1384, 5 août.
[xxxix] 1384, 5 août.
[xl] 1384, 22 août.
[xli] 1384, 22 août.
[xlii] 1384, 2 septembre.
[xliii] 1384, 5 décembre.
[xliv] 1384, 13 juillet.